Il-Purgatorju x’inhu?

1

🌻 Alla mhuwiex biss imħabba perfetta, iżda wkoll ġustizzja perfetta. Fl-imħabba tiegħu jaħfrilna l-infern u jiffurmana fi bnedmin jisħoqqilhom il-premju tal-Ġenna.

🌻  Fil-ġustizzja tiegħu, Alla jrid li aħna mhux biss ma nagħmlux id-deni lill-oħrajn, iżda jrid li meta nagħmlu d-deni apparti li nqerru għandna npattu għalih bit-tajjeb (il-penitenza) u għandna nipprattikaw b’ġenerożità kbira t-talb, is-sawm u l-karità. Aħna m’għandniex biss ma nagħmlux il-ħażen, iżda għandna nagħmlu ħafna tajjeb.

🌻 Il-Purgatorju jtemm fina dak li jonqos minn din it-tpattija xierqa u għat-tajjeb li kellna nwettqu u ttraskurajna. Huwa piena u tbatija, iżda mingħajr disprament, għax inkunu nafu li sejrin il-Ġenna.

Għaliex essenzjali li nżommu kuntatt ma’ Alla u ngħixu skont it-tagħlim ta’ Ġesu’?

74

🌻 Fit-tagħlim tiegħu, Ġesu’ jgħidilna:

  • “Ishru u itolbu biex ma tidħlux fit-tiġrib” (Mattew 26, 41)
  • Fil-Missierna, Ġesu’ għallimna nitolbu: “Iddaħħalniex fit-tiġrib, iżda eħlisna mid-deni” li fi kliem ieħor, Ġesu’ jridna nitolbu ‘l Missierna tas-sema: “tħalliniex naqgħu fit-tiġrib, tħalliniex naqbdu t-triq li twassal għad-dnub.”

🌻 Jeħtieġ li nfittxu l-qawwa ta’ Alla u biex nagħmlu dan:

  • Irridu nkunu konvinti li “Alla hu fidil u ma jħallikomx tiġġarbu aktar milli tifilħu; jaħseb li mat-tiġrib jagħtikom il-qawwa u l-għajnuna biex tkunu tifilħu għalih” (1 Korintin 10, 13)
  • Għalhekk imiss lilna, li rċevejna l-qawwa speċjali u d-dawl tal-Ispirtu s-Santu fis-sagrament tal-Griżma, li nagħmlu kuntatt miegħu u nfittxuh, l-aktar meta nħossuna dgħajfa.

Għaliex il-Quddiesa hija importanti fil-ħajja tan-nisrani?

69

🌻 Ġesu’ kkmanda: “Agħmlu dan b’tifkira tiegħi” (Luqa 22:19). X’tip ta’ tifkira hi din? Mhix biss memorja ta’ xi ħaġa tal-passat (bħal ritratt jew party tal-birthday) imma hija memorjal, jiġifieri dak li ġara fil-passat jiġri issa waqt li niftakru. Mela l-quddiesa mhux tirrappreżenta lil Kristu iżda tippreżenta, tagħmel preżenti lil Kristu fostna.

🌻 Il-Quddiesa hija importanti fil-ħajja tan-nisrani għax:

  • Nobdu l-kmand t’Alla li nħarsu l-Jum tiegħu.
  • Naqtgħu x-xewqa u l-kmand ta’ Ġesu’ li mmorru għandu u li nibqgħu nagħmlu dan b’tifkira tiegħu.
  • Mingħajr din il-manna mis-sema mmutu f’dan id-deżert ta’ din id-dinja.
  • Mingħajr dan l-Ilma ħaj ninxfu spiritwalment u ninqatgħu minn Alla.
  • Mingħajr Kristu ma nistgħu nagħmlu xejn. Min jaħseb li jista’ jżomm ħajja r-relazzjoni ma’ Ġesu’ waħdu u bla għajnuna tas-sagramenti huwa żbaljat bil-kbir.
  • Id-dixxiplu individwali jesperjenza u jsaħħaħ l-għaqda tiegħu mal-komunita’ li temmen u tħobb lil Sidu.
  • It-Tqarbin hu t-Triq, il-Verita’ u l-Ħajja. Ħadd ma jmur għand il-Missier jekk mhux b’Ġesu’. Mela t-tqarbin magħmul sewwa fil-kuntest tat-talb u l-qima tal-Quddiesa huwa l-mezz ewlieni biex naslu għall-ħajja ta’ dejjem.

X’għandi nagħmel fil-prattika biex ngħix dejjem fil-Ferħ Spiritwali?

68

🌻 Fil-Prattika għandi:

  • Nidħol fil-preżenza t’Alla bil-fidi.
  • Il-fidi hi ftuħ – ftuħ tal-qalb tagħna quddiem Alla.
  • Dan il-ftuħ iwassalna biex nagħmlu ‘esperjenza ħajja’ ta’ Ġesu’ ‘ħaj’ f’ħajjitna.

🌻 Biex nagħraf il-veritajiet tal-fidi, irrid l-ewwel nagħmel att ta’ fiduċja f’Alla u nemmen f’MIN bagħat – IBNU L-GĦAŻIŻ. Jekk nemmen li Ġesu’ jħobbni u ġie biex isalvani, allura:

  1. ser nafdaH,
  2. ser nieħu pjaċir niltaqa’ miegħU fit-talb,
  3. se nfittxU sa ma nsibU,
  4. sa ma nisma’ lehnU,
  5. sa ma nħalliH imexxili ħajti
  6. sa ma jwassalni għall-Glorja tal-Ġenna.

Biex il-ħajja tkun suċċess għandna bżonn ta’ Ġesu’. Għaliex?

8

🌻 Hemm żewġ tipi ta’ suċċess: jew dak skont id-dinja jew dak skont Alla. Fid-dinja huwa suċċess dak li hu:

  • mlaħħaq,
  • sinjur,
  • komdu,
  • famuż,
  • għandu kull soddisfazzjon (sesswali, oġġetti, propjeta’ …), eċċ… u
  • min jirnexxilu jibni ‘image’ tiegħu nnifsu fil-pubbliku.

🌻 Huwa suċċess skont Alla dak li jobdi ‘l Alla u li jaħżen teżori fis-Sema bit-talb, sawm u karita’. Huwa suċċess dak li jgħix fil-virtu u jipprova jsir dejjem aktar jixbah lil Kristu. Aktar ma wieħed isir jixbah lil Kristu, aktar isir bniedem li jagħti glorja ‘l Alla u jsir bniedem sħiħ.

X’tip ta’ żbalji għandha l-Bibbja?

58

🌻 Alla ma ddettax il-Bibbja. Alla nebbaħ u ħalla f’idejn l-awturi umani biex jifformulaw fil-kliem u l-kitba l-messaġġ tiegħU. Dawn uzaw il-mezzi kulturali, ta’ intelligenza u informazzjoni li kellhom biex jesprimu l-messaġġ ta’ Alla.

🌻 Mela peress li l-awturi umani ġieli kellhom xi ideat żbaljati fuq numri, ismijiet ta’ postijiet, ideat fuq id-dinja u l-univers, eċċ, insibu minnhom fil-kitbiet taghhom.

🌻 B’daqshekk ma jfissirx li l-Bibbja żbaljata u falza għax li jgħodd huwa l-messaġġ spiritwali, u dan ma jiġix affettwat minn dettalji żbaljati bħal ma semmejna.

🌻 Iva, il-Bibbja għandha żbalji dwar fatti (per eżempju, dati, ismijiet, dettalji fuq postijiet) li mhux meħtieġa għar-rabta tagħna m’Alla.

🌻 Il-messaġġ spiritwali, jiġifieri dak li ried jagħtina Alla, huwa ċert u mingħajr żbalji – huwa l-verita’ għas-salvazzjoni tagħna.

🌻 Il-Fidi hi rigal li jagħtina Alla. Aħna nistgħu nieħdu ħsiebha u nkabbruha u/jew nistgħu nitraskurawha u nitilfuha. Biha aħna nagħmlu ‘esperjenza’ ħajja tieghU meta nemmnu fiH, nafdawH u nfittxuH fit-talb.

🌻 Il-kitbiet nstabu u ġew miżmuma minn ġenerazzjoni għall-oħra. Minn dejjem ġew meqjusa bħala Kotba Sagri.

🌻 Ma setgħatx tkun leġġenda għax il-Kelma t’Alla għada u tibqa’ tapplika għal kull żmien u ġġib bidla ta’ vera f’dawk li jimxu fid-dawl tagħha.

🌻 Prova ta’ dan huma l-qaddisin anki fi żminijietna – li kieku din kienet leġġenda, ma kienx ikollha l-ebda effett fuq il-ħajja tal-bniedem.

Kif inkun naf li l-kelma li nkun smajt fit-talb tkun ġejja minn Alla? Kif se nkun ċert li mhux ġejja minn moħħi eċċ…?

12

🌻 Meta Alla jkellmek fit-talb, wara jikkonfermalek dak li jkun qallek billi juża’ eżempju:

  • l-Iskrittura,
  • xi ‘talk’ jew omelija li tisma’,
  • b’dawk ta’ madwarek,
  • biċ-ċirkostanzi li jgħaddik minnhom
  • u ħafna oħrajn…

🌻 Aktar ma’ tkun lest li tisimgħU, aktar tibda tifhem u tinduna meta jkellmek Hu.

🌻 Hu jkellmek biss meta jara li x-xewqa tiegħek li tisimgħU hi xewqa b’intenzjoni tajba, jigifieri, bl-intenzjoni li tobdi r-Rieda tiegħU kull meta jurihielek.

Kif inkun ċert li qiegħed fil-preżenza t’Alla fit-talb? Għandi nara’ xi sinjal jew inħoss xi ħaġa? Jekk ma nara u nħoss xejn, jiġifieri Alla mhux preżenti, jew forsi li jien għandi nieqaf nitlob għax qed nitlob ħażin?

13

🌻 Li wieħed jara jew iħoss mhux importanti. Il-ħass jista’ jkun ‘ħass ħażin’!! L-importanti b’liema attitudni qed nidħol fit-talb. Jekk ix-xewqa tiegħi hi li Alla jibdilni għall-aħjar, kif u meta jrid Hu, allura fil-mumenti tat-talb, tassew jiġri dan anki meta wieħed ma jintebaħx.

🌻 Eżempju: Ġieli fis-Sajf, meta tkun ħdejn il-baħar, ix-xemx tkun mgħottija bis-sħab u mhux talli ma tidhirx, imma ukoll ma tħossx ir-raġġi qawwijin tagħha fuqek. Minkejja dan, meta tmur id-dar u tħares fil-mera, ġeneralment tinduna li tkun ħaditek xorta waħda bla ma int indunajt! Hekk jiġri minn min jidħol fil-preżenza t’Alla fit-talb b’xewqa sinċiera u b’fidi fiH.

 

It-talb kif jorbot mas-suċċess tal-ħajja tal-bniedem?

14

🌻 Hija mentalità profondament żbaljata u ereżija li l-bniedem kapaċi waħdu:

  • jibni lilu nnifsu,
  • jeħles minn ħtijietu u d-dgħufijiet tiegħu,
  • jibni ambjent ġust madwaru
  • u jsalva ruħu fl-eternità.

Hija suppervja li bniedem jimmaġina li jista’ jwassal lilu nnifsu waħdu għal suċċess bħal dan.

🌻 Ġesu qal: “Kif il-fergħa ma tistax tagħmel frott minnha nfisha jekk ma tibqax fid-dielja, hekk anqas intom jekk ma tibgħux fija. … għax mingħajri ma tistgħu tagħmlu xejn.” (Ġwanni 15: 4-5).

🌻 Permezz tat-talb mimli fidi, talb sinċier u ma jaqta’ xejn, aħna nibqgħu f’Ġesu’ u Ġesu’ jibqa’ fina u jagħtina l-Ispirtu s-Santu. L-Ispirtu s-Santu

  • jgħallimna,
  • jiffurmana,
  • isaħħaħna,
  • jagħtina l-għerf,
  • l-għaqal,
  • il-biża’ t’Alla,
  • iqawwilna l-fidi, it-tama, l-imħabba …

Mela s-suċċess jirriżulta minn tnejn jaħdmu id f’id: jien u Alla.

🌻 Min jgħix ħajtu bla ma jafda lil Alla jkun ħati ta’ dnub li ma jinħafirx (kontra l-Ispirtu s-Santu – li jkun ġie mogħti lilu għal xejn).

🌻 Min jikkoopera mal-Ispirtu s-Santu jsir, għax hekk jagħmel Alla, bniedem sħiħ fi Kristu; bniedem tal-Beatitudnijiet. Dan hu bniedem kif iridu Alla u għalhekk jagħtih il-premju tal-ħajja ta’ dejjem – jiġifieri r-rebħa tas-suċċess.

Huwa żgur li Alla jweġibna meta nitkellmu miegħU fit-talb?

5

🌻 Iva, żgur imma jrid ikollna attitudni u xewqa sinċiera li nsibu lil Alla, ħalli naraw xi jrid jgħidilna u nfasslu ħajjitna fuq dak li jrid Hu.

🌻 Hu stess wegħedilna din il-ħaġa. F’Ġeremija 29: 11 Alla jgħid li kull wieħed u waħda minna:

“Jien naf il-pjanijiet li ħsibt għalikom; pjanijiet ta’ ġid u mhux ta’ ħsara, li nagħtikom ġejjieni mimmli tama. Intom issejjħuli u tiġu titolbuni u jien nismagħkom, tfittxuni u ssibuni. Meta tfittxuni b’qalbkom kollha, issibuni.”

🌻 Mela, la Hu stess wegħedna u aħna nemmnu li Hu ħaj, iweġibna ŻGUR għax min hu haj, jikkomunika.