Dan it-Talb Speċjali kollu miġbur f’dokument wieħed – PDF
MUR GĦAL-LISTA TA’ TALB SPEĊJALI
Mulej ħanin, il-konverżjoni hija grazzja li l-bniedem jagħżel li jilqa’ minn għandek. Fit-tjieba tiegħek, agħti lill-bnedmin kollha din il-grazzja u agħmel li nilqgħuha b’indiema sinċiera u Qrara tajba.
Agħmel li din twassal lil dawk I-insara li qed jgħixu ‘l bogħod minnek skont l-ispirtu tad-dinja, biex iduru lejk b`qalb sogħbiena u b’konvinzjoni li jibdew folja ġdida f’ħajjithom billi jħallu l-passat warajhom, u jibdew jgħixu skont ir-Rieda tiegħek.
Agħti wkoll il-grazzja tal-konverżjoni lil dawk li qatt ma semgħu bik jew li qed jagħrfu fir-reliġjon Kattolika Rumana l-vera reliġjon u għalhekk għandhom ħajra li jsiru membri ħajja fil-Knisja. Agħmel li jsibu min jgħinhom u jwassalhom ħalli jkabbru l-fidi tagħhom u jitgħallmu jgħixu ta’ nsara tassew skont ix-xewqa tiegħek.
Nitolbok għalina lkoll li ilna mhux ħażin miexja warajk biex il-grazzja tal-konverżjoni nħaddnuha aħna u nikbru fil-qdusija. Fil-ktieb tal-Proverbji nsibu li
“il-ġust jaqa’ seba’ darbiet kuljum”
(Proverbji 24: 16)
u għalhekk jeħtieġ li nkomplu ninbidlu billi nwarbu minna dak li hu ġej mill-ħażin (anki jekk dnubiet venjali) u nintrabtu dejjem iżjed mat-tajjeb u ma’ dak li jagħmilna iżjed nixbħu lilek, għażiż Ġesu’.
Grazzi talli Inti dejjem tiġri warajna u sal-aħħar ta’ ħajjitna tibqa’ tħabbat fuq qlubna bil-grazzja tal-konverżjoni li twassalna għas-salvazzjoni eterna. Ieqaf mall-moribondi li jeħtieġu din il-grazzja qabel jintilfu għal dejjem u agħmel li jkun hemm ħafna aktar nies li jitolbu għall-konverżjoni tal-erwieħ ħalli Int ma tkunx xerridt demmek għalxejn. Dan kollu nitlobulek għall-akbar glorja tiegħek Trinita’ Qaddisa u għat-tkabbir ta’ Saltnatek. Ammen. Grazzi. Halleluia!
L-Ewkaristija u s-Saċerdozju 