Dan it-Talb Speċjali kollu miġbur f’dokument wieħed – PDF
MUR GĦAL-LISTA TA’ TALB SPEĊJALI
Għażiż Mulej Ġesu’, Ħajja tiegħi, kull ma għandi, wara li Int temmejt il-ħidma tiegħek fuq din l-art bħala bniedem, ftit qabel tlajt is-Sema, Int għidt dan id-diskors lid-dixxipli tiegħek:
“U jiena, araw, nibghat fuqkom lil Dak li wiegħed Missieri. Imma intom ibqgħu fil-belt, sa ma’ Alla jkun libbiskom bil-qawwa tiegħu.”
(Luqa 24: 49)
Hi propju din it-talba tiegħi llum, li Inti jogħġbok tibgħat fuqi mill-ġdid lil Dak li wiegħed Missierek. Jien se nistenna sa ma’ Int tlibbisni bil-qawwa tiegħu. Għaliex, għidli, kif nista’ ngħix fuq il-passi tiegħek, jekk ma jkollix jien ukoll l-Ispirtu Qaddis kif kellek Int u kif kellhom il-qaddisin ?
X’imkien ieħor, Int ordnajt lid-dixxipli biex jibqgħu miegħek u jishru fit-talb. Imma ftit wara Int stess stqarrejt li “l-ispirtu jrid iva, imma l-ġisem dgħajjef.” (Mattew 26: 42) U dan hu propju kif inħossni jien – dgħajfa. Ħenn għalija Mulej Sidi u agħtini l-Ispirtu mwiegħed għax jien tassew nixtieq inkun qaddisa bħalek. Nixtieq nogħġbok u nkun l-għaxqa tiegħek bħalma l-Missier sab l-għaxqa tiegħu Fik.
Għalhekk, ja Sidi, jien inpoġġi fuq fommi kliem is-salmista li qal:
“Ara, bħal għajnejn il-qaddejja lejn id sidhom; bħal għajnejn il-qaddejja lejn id sidtha; hekk għajnejna lejn il-Mulej, Alla tagħna, sa ma jkollu ħniena minna.”
(Salm 123: 2)
U jien inkompli:
“Ħenn għalija Mulej, ħenn għalija!… Malli tibgħat in-nifs tiegħek, jien ninħoloq, u Inti ġġeddidni.”
(Salm 104: 30)
Grazzi talli tajt kas tat-tnehid tiegħi li ġibt quddiemek f’din it-talba. Tkun imbierek għal dejjem O Alla Imħabba tiegħi, ta’ dak kollu li għamilt għalina biex tgħenna nsiru qaddisin bħalek. Ammen. Halleluia!
L-Ewkaristija u s-Saċerdozju 